Dwar l-Arti tal-Poeżija

Il-filosfu Grieg Aristotli kien l-ewwel studjuż li ddedika kitba sħiħa lit-teorija tal-letteretura bl-isem ta’ Dwar l-Arti tal-Poeżija. Magħruf tradizzjonalment bħala l-Poetika, dan ix-xogħol kontroversjali jmur lura għar-raba’ seklu Q.K. Fih, Aristotli jgħarbel x’inhu dak li jsawwar l-aħjar traġedja drammatika, filwaqt li janalizza wħud mill-aqwa traġedji tat-teatru Grieg, bħal Edipu Sultan ta’ Sofokli. Ix-xogħol kellu influwenza kbira fuq ħassieba u drammaturġi matul is-sekli, u għadu meqjus sal-lum bħala trattat fundamentali fl-Istorja tal-Kritika Letterarja. Karmenu Serracino qed jittraduċi dan ix-xogħol mill-Grieg Klassiku għall-Malti, filwaqt li jikkonsolida t-traduzzjoni b’introduzzjoni u noti komprensivi li jgħinu lill-qarrej jifhem aħjar l-ideat Aristoteliċi u l-isfond storiku li fih kiteb il-filosfu.